હજુયે મનમાં જીવે છે ભાવ દુન્યવી જગતના

હજુયે મનમાં જીવે છે ભાવ દુન્યવી જગતના
ધન્યતાને દિવ્યતાનો સાદ સંભળાતો નથી

તાળીઓના ગડગડાટમાં માણે નિજ પ્રશંસાની પળો
અન્યની કદરદાનીનો તલસાટ સંભળાતો નથી

ખુદને માટે તાળી પડે તો ગમે છે સૌને બહુ
ઇતરની રચનાઓમાં પ્રતિસાદ સંભળાતો નથી

એકાંતના અરિસામાં પડે જે પ્રતિબિંબ એ જ સાચું
જાહેરમાં નિખાલસતાનો નાદ સંભળાતો નથી

ગણગણે તો છે સૌ એકાંતની પળોમાં શાનદાર રીતે
સભામાં પોતાને જ પોતાનો અવાજ સંભળાતો નથી

શીખી જઇએ હકારાત્મક સરવાળો કરતાં જો ‘’સરલ ‘’
તો ભાગાકાર ને બાદબાકીનો વાદ સંભળાતો નથી

..... સરલ સુતરિયા ...