સહિયારું ભાવવિશ્વ...

સહિયારું ભાવવિશ્વ

ના તું (અહમ્ ) હશે ના હું (અહમ્) હોઇશ
આપણું એક સહિયારું ભાવવિશ્વ હશે
શ્વાસની સરગમ મજાની કહેશે
............ બસ તું હશે ને હું હોઇશ ..
.
શ્વાસે શ્વાસે મહેંક મિલનની
હૈયા દરબારે મહેફિલ જામી હશે
રાગ છેડાશે મેઘ-મલ્હાર ને ભિંજાતા
............ બસ તું હશે ને હું હોઇશ ..
.
અરણ્યે ટહુકશે મોર બપૈયા
ઉપવને ફુલો મહેંકતા હશે
કોકિલના કલશોર સાથે
............ બસ તું હશે ને હું હોઇશ ..
.
કલરવતી નદીના કાંઠડે
વહેતા નીરમાં પગ બોળ્યા હશે
એકમેકના નયને સમાતા
.............. બસ તું હશે ને હું હોઇશ ..
.
પરસ્પર હૈયે ભાવ જાગતા
મનધરામા ભરતી હશે
ચિત્તાકાશમાં જામશે મેઘાડંબર
............. બસ તું હશે ને હું હોઇશ ...
.
મેઘધનુષ્યના સાતે રંગો
તારા નયનમાં અંજાયા હશે
મારી કીકીમાં ઉભરાશે ભાવો
............. બસ તું હશે ને હું હોઇશ ..
..............સરલા સુતરિયા.......